دعوة الأخ أبوفارس صاحب مدونة " صعيدى "

دعـــــــــــــــــــــــــــــــــــوة

الحمد لله وكفى وصلاة وسلام على عباده اللذين اصطفى وبعد….

مقدمة:أرجو ألا يأخذكم الاستخفاف بالفكرة لمجرد أنها بسيطة أوليست عبقرية!!

فكونها منطقية وواقعية وأهدافها عظيمة وسهلة التنفيذ وبدون ميزانية خاصة فهذا كفيل بضرورة اعطائها كل الاهتمام.

أساسيات منطقية:    

الفساد الاداري المستشري ضحيته دائماً المواطن (العميل) أو متلقي الخدمة.

الواقعية والصدق في التخطيط والتنفيذ هي أساس النجاح.

وبعد..

كام واحد بيدور على واسطة قبل ما يروح يخلص خدمة من مصلحة حكومية؟

كام واحد بيدور على حد يشتكي له فساد وإهمال في المؤسسات الخدمية وما يلاقيش؟

طيب كام موظف عنده فكرة تطور في مؤسسته؟أو شايف إهدار لمال عام وعنده حل بديل بس مش عارف يوصل صوته !!!

الفســـــــــــــــــــــــــــــــــــــــــــــــــــــــاد

يافطة كبيرة ، كبيرة قد كبر عدد الضحايا - احنا - الشعب صحاب البلد

بس للأسف ………. أنا شايف صورة عتمة….

شايف إن الفساد المستشري ده زي مبارة كورة في التلفزيون مثلا…..

وكأننا كلنا قاعدين قدام تلفزيون بنتفرج على المباراة ،

كل اللى بنعمله نقول في سرنا ، ياه لو كان "باصاها" هنا أو لعبها هناك ، ولا نقول خسارة كانت فرصة حلوه، بنقول في سرنا كلامنا مش مؤثر في سير المباراة ، ولا حد حاسس بينا.

لكن للأسف المباراة بتخلص و بننسى بعد شوية ، لكن للأسف الهزيمة هنا ح تبقى هزيمة لينا كلنا ، نفضل نعاني منها احنا وأولادنا … بالذمة ده كلام ينفع؟!!!

* طيب ما تيجي نشارك مشاركة إيجابية ، ننزل الملعب، ح نكسب ، وحتى لو خسرنا مرة نبقى حنصبح فريق واحد نقوى بعضنا ، وقريب قوى نكسب باذن الله ؛ حتى لو ح نكسب أنفسنا ، أولادنا يطلعوا يلاقوا هوا نضيف ، وسما صافية.

ده فلسفة المشروع اللى راح أحكي عنه، نبقى فريق واحد نتحمل المسئولية كلنا….

كلي أمل إن احنا سوا كفريق نقدر نفذ المشروع ده ،حتى لو للفساد ناس بيحموه ، لو لقونا كلنا متحمسين للمشروع ح يختشوا و ينفذوا المشروع… ها متفقين؟ نشارك سوا..؟

أنا مش عاوز أقول ولا أحكي إزاي وقدر استطاعتي حاولت أوصل المشروع لمسئولين وكبار ، ولا عاوز أقول إيه الردود  الساذجة اللى اتقالتلي علشان ما ينفذوش المشروع … باختصار مش عاوز أجرح حد أبدأ صفحة جديدة لأن هدفي الحقيقي المشروع يتنفذ بينا سوا…

نهايته.. المشروع : بيعمل على المؤسسات الحكومية الخدمية كبداية

هدفه:

·                     ليوم واحد في الأسبوع المواطن يلاقي خدمته سهله وسريعة ومعاملة آدمية داخل المؤسسات الحكومية.

·                     لو مواطن قدم شكوى ، يلاقي مسئول أمامه وبسرعة يحل المشكلة.

·                     ح نستخلص من الموظف أفكار وابتكارات لتطوير وتحسين الأداء في مؤسسته.

·                     لن يقتصر دور الرقابة على شلة محددة بل كل الموظفين في الدولة يشاركوا في الرقابة.

·                     سنفعل اللامركزية التي هي الباب العملي للتطوير والتقدم  في بلد في حجم بلادنا.

·                     لن نرهب موظف ، بل نفترض حسن نية فيه ونعطيه الفرصة ليثبت وطنيته.

كل ده سيكون (سيستيم) نظام عمل ندور كلنا فيه ، مش فئة ثابتة منتفعة منه.

طب إيه الفايدة:

لما كلنا نشترك في الرقابة ، ساعتها نصدق إن فيه اتجاه لإصلاح حقيقي.

ساعتها نحس إن دي بلدنا كلنا وكل واحد فينا يعرف إن مجهوده مهم

ساعتها نبطل كلمة وأنا مالي اللى ضيعت عمي جحا.

ساعتها ح يعلى صوت المخلصين.

ساعتها الفيران تدخل جحورها ويختفي الفساد لأنه ح يخاف مواجهة شعب كامل.

ساعتها نسيب مقعد المتفرج ، السلبي ، ونفجر طاقات خلاقة تبني في بيتنا الكبير.

ساعتها ح تظهر الأفكار والابتكارات البناءة لأنها مش ح تخاف من وأد بنات الأفكار.

ساعتها ما نخافش على ولادنا يعجزوا بدري ، لا ح ياخدوا فرصتهم لأن الواسطة ح تختفي.

كل ده ممكن يتحقق لو فيه إرادة ؛ من غير فلوس ، ولا تكاليف ، عاوز بس إرادة .

وكل التفاصيل في ملف معد يشمل كل التفاصيل وآليات التنفيذ بس حد يقول نبدأ…

أملي كبير في وجه الله إني أحضر تنفيذ المشروع البسيط العملي الغير مكلف ده

وشكرا ،،،

أبو فارس

جمهورية مصر العربية

تليفون محمول

0121329533

أرجو الاتصال في غير موعد الصلاة

 يدلني عليه لينفذ هذا المشروع

اللي يعرف راجل مخلص في أي حكومة في دولة عربية وفعلا بيمقت الفساد

 harebfasaad_rashwa@maktoob.com ايميل الحملة